Причината за смртта на професионалниот борач и поп-културна икона од деведесеттите години, Халк Хоган, била срцев удар, се наведува во извештајот на медицинскиот вештак од Флорида.

Хоган (71), со вистинско име Тери Болеа, претходно боледувал од леукемија и атријална фибрилација, нарушување на срцевиот ритам, стои во извештајот на медицинскиот вештак од Шестиот округ, пренесува „Јуроњуз“.

Во чест на „Халкстерот“, гувернерот на Флорида, Рон ДеСантис, соопшти дека денеска знамињата на сите државни институции ќе бидат спуштени на половина копје, а денот е прогласен за „Ден на Халк Хоган во Флорида“.

Хоган бил прогласен за мртов во болница помалку од 90 минути откако итната помош стигнала во неговиот дом во Клирвотер, по повик за срцев застој наутро на 24 јули, соопшти полицијата. Во извештајот се наведува дека причината за смртта е „природна“.

„Имаше здравствени проблеми, но навистина верував дека ќе ги надминеме. Овој губиток е изненаден и невозможно е да се прифати. За светот тој беше легенда… но за мене, тој беше мојот Тери“, напиша сопругата на Хоган, Скај Дејли, на Инстаграм.

Ќерката на Хоган, Брук Болеа Олекси, позната под уметничкото име Брук Хоган, се прости од својот татко на социјалните мрежи.

„Неопишливо сум благодарна што ја познавав неговата вистинска страна. Не само таа што светот ја гледаше низ внимателно избрана призма“, напиша таа на Инстаграм.

Плановите за погребот сè уште не се јавно објавени.

Хоган се појави во бројни филмови и телевизиски емисии, вклучително и во своја реалити-серија, а во 2024 година ја поддржа претседателската кандидатура на Доналд Трамп.