Жители од осум села во Горна Река, Општина Маврово-Ростуше веќе пет дена се без пристапен пат, отсечени од светот. . Сообраќајницата која води кон овие села е непроодна, откако обилните врнежи од дожд го урнаа мостот од река Радика.

Најпогодени се мештаните од село Нистрово, каде има најголем број постојани жители, триесетина.

Жителите од ова населено место, не можат да пристигнат до своите работни места, а како најголем проблем го посочуваат тоа што немаат храна за стоката.

„За лекови и за храна, некако ќе се снајдеш, особено за храна, ќе се позајмиш во самото село од некој роднина или сосед, ќе помине денот. Но, за стоката е проблем, има некои луѓе чуваат овци треба да им се донесе храна на стоката, а патот е непрооден, требаше еден камион да донесе храна, но се случи тоа што се случи, се урна мостот над реката Радика и патот е непрооден. Инаку за јадење ќе земам јас од кај тебе, ти од кај мене, ќе поминеме некако, ама треба патот под итно да се санира, сега се подготвуваат луѓето за зимно време, изјави Калош Билали жител на горнореканското село Нистрово.

Градоначалникот на Општина Маврово-Ростуше Медат Куртовски, вели дека е одржана Седница на Советот на Општина Маврово-Ростуше, каде се разговарало за состојбата со отсечените села. Според него, донесени се „краткорочни и долгорочни одлуки, а веќе се работи на терен за оспособување на патот“.

„На седницата донесовме одлука да се преземат активности за оспособување на патот. Веќе е ангажирана градежна фирма со која имаме склучен договор. Средствата ќе бидат обезбедени од Програмата за одржување на локални патишта и мостови. Зборуваме за привремено решение за да може да се пристигне до село Нистрово. А за целосно и трајно решение ќе треба да се изработи проект и да се обезбедат соодветни средства, работиме и на оваа идеја,“ изјави градоначалникот на Општина Маврово Ростуше Медат Куртовски.

По поголеми обилни врнежи или наноси од снег, жителите на горнореканскиот крај често се соочуваат со блокирани патишта поради оштетувања или одрони. Тие се жалат дека не се преземаат сериозни превентивни чекори и велат дека веќе по „традиција“ зимно време се отсечени од светот.