Поминаа осум години од страшната несреќа што го снајде Михаел Шумахер на скијање на француските Алпи. Седумкратниот шампион во Формула 1 се спушташе по необележан дел од патеката во одморалиштето Мерибел и изгуби контрола над скиите, падна и удри со глава во карпа.

Тој веднаш по несреќата со хеликоптер бил пренесен во најблиската болница во критична состојба. Тој беше подложен на две операции, а потоа беше ставен во индуцирана кома за да се зачува што е можно повеќе од неговата мозочна функција. Во јуни 2014 година, Шумахер излезе од индуцирана кома, а неговата портпаролка потврди дека слуша и реагира на допир. Исто така, беше објавено дека Германецот ја напушта болницата во Гренобл и продолжува со опоравувањето во својата куќа на Женевското езеро.

Семејството не сака да зборува за неговата состојба..

– Тој отсекогаш ја ценел приватноста и ние се стремиме да продолжиме да живееме како семејство, како што сакаше и како сè уште сака Михаел. Правиме терапии со него и правиме сè што можеме за да се чувствува подобро и удобно.

Продолжуваме да живееме, а приватното е приватно, како што секогаш велеше. Многу ми е важно тој да продолжи да ужива во приватноста што е можно повеќе. Отсекогаш нè штител, сега ние го штитиме него – се зборовите на неговата сопруга Корина.

Постојат различни приказни за состојбата на Шумахер, а само малкумина можат да го видат.

– Шумахер не зборува. Тој комуницира со своите очи. Само три лица смеат да го видат – рече поранешната сопруга на Флавиус Бријаторе.

Пјеро Ферари, потпретседател на Ферари и син на легендарниот Енцо, потврди дека Шумахер не може да зборува. Жан Тод, поранешен прв човек на ФИА е еден од ретките што се осмелува да стигне до Шумахер, но дури и тој никогаш не дава прецизни информации, туку се се сведува на фразата „Михаел сè уште се бори“.