Со свои реакции за предлогот на Алтернатива за формирање на Заедница на албански општини во Македонија се јавија и од ЛДП и СПМ.

Како што пишува ЛДП, потребни се иницијативи со кои ќе се поттикнат граѓаните на единство и кои ќе стимулираат да зборуваме за квалитет и развој, а не за поделби по било какви основи.

„Не само што не треба да се спомне, туку не треба ни да се промовира иницијативата за „Асоцијација на албански општини“ во Северна Македонија затоа што тоа е чин кој создава групирања и поделби и се коси со вредностите за либерално-демократско, европско општество кон кое се стремиме.Во време на европски интеграции ваквата иницијатива води кон создавање на нови поделби во општеството, а не кон заедништво. Северна Македонија е мултикултурно општество, во кое освен Албанци, живеат и Турци, Бошњаци, Власи, Срби, Евреи, Роми и останати заедници.Би сакале да потенцираме дека аспирациите на “големи држави“ одамна се минато и не носат ништо освен партиски поени“, се вели во острата реакција на Либерално-Демократската партија.

Од Социјалистичката партија на Македонија велат дека со зачуденост ја добиле информацијата за иницијативата на партијата Алтернатива за формирање на Заедница на албански општини во Македонија.

Оваа партија како да заборавила дека прашањето е решено со Уставот и дека Македонија е унитарна мултинационална држава. Прашањето за соработка меѓу општините е затворено со Рамковниот договор и со Законот за локалната самоуправа, велат од СПМ

СПМ оценува дека Алтернатива доцни со овој предлог само 21 година, зошто Законот за локалната самоуправа што го регулира ова прашање е донесен во 2002 година.

„Во член 14 од овој Закон е предвидена меѓуопштинската соработка и тоа: „(1) Во вршењето на своите надлежности, општините можат меѓусебно да соработуваат. (2) Заради остварување на заедничките интереси и вршење на заедничките работи од надлежност на општините, тие можат да здружуваат средства и да формираат заеднички јавни служби, во согласност со закон. (3) Со цел за извршување на одделни надлежности, општините можат, исто така да формираат заеднички административни тела во одредени области, во согласност со закон. (4) Општините можат да соработуваат и со единици на локалната самоуправа на други земји, како и со меѓународни организации на локалните заедници, како и да членуваат во меѓународни организации на локалните власти.Од цитираните законски одредби е јасно дека меѓуопштинската соработка е право и можност на секоја општина и тоа се случува веќе две децении без разлика дали се македонски, албански, турски, ромски или други општинини, стои во партиската реакција на СПМ.

Двете големи владеачки партии СДСМ и ДУИ се изјаснија против предлогот на Алтернатива за формирање на Заедница на албански општини во Македонија.

За СДСМ е несериозен, а за ДУИ е антиевропски предлогот на Алтернатива.

Демократски сојуз: Ги осудуваме изјавите на албанските партии за дестабилизација на Македонија