Со можноста да претседава со ОБСЕ, на Македонија ѝ е укажана голема чест и доверба дека е одговорна држава, способна да биде на чело на најголемата безбедносна организација, во која се вкупно 57 земји. „Се работи за луѓето“ (It’s about people) е мотото под кое ќе биде реализирано претседавањето.

– Од консументи на услугите на ОБСЕ, стануваме претседавачи на организацијата. Тоа што го постигна Северна Македонија внатре, преку мултиетничката функционална демократија, мултиетничките односи, културата на дијалог што го наметна, културата на компромис, добрососедските односи, сето тоа создаде имиџ кај државата, а со тоа и препознавање во меѓународната заедница дека ние сме сега зрели за да можеме тоа наше искуство во тоа наше созревање, сега да го пренесеме во регионот на ОБСЕ преку претседавањето со ОБСЕ – рече министерот за надворешни работи Бујар Османи на вчерашниот брифинг со новинарите.

Годинава, колку што трае мандатот, ќе биде исклучителна можност за меѓународна промоција на нашата држава и за тоа, според министерот за надворешни работи Бујар Османи, ќе треба поддршка од професионална пи-ар агенција, бидејќи нема таков кадар во ресорното министерство.

– Ангажирањето на агенцијата „Рејтинг“ ќе чини 6 милиони денари (околу 100.000 евра), но тие пари не се за пи-ар, туку со нив ќе се платат трошоците за организирање на Министерскиот совет на крајот на годинава, бидејќи таков кадар во МНР нема. На министерскиот состанок во декември во Скопје ќе дојдат повеќе од 70 министри за надворешни работи, а ние немаме ни соодветен објект во кој може да се организира таков настан – објасни Османи.

Од ОБСЕ веќе дошле експерти да видат дали спортската сала „Борис Трајковски“ во Скопје ги задоволува безбедносните стандарди, по што било заклучено дека е потребно доградување некои простории, по што завршната конференција на македонското претседавање со ОБСЕ може да се одржи таму.
Токму Министерскиот совет, како што изјави Османи, ќе биде најголемата ставка кога се зборува за тоа колку ќе нè чини претседавањето со ОБСЕ. А за 6 февруари е најавена уште една голема конференција за антисемитизам, на која ќе има од 200 до 300 учесници. Што се однесува до трошоците за претседавањето, проблем ќе биде и да се обезбедат 70 ВИП-возила за Министерскиот совет, кои државава ги нема, па ќе мора да се бараат спонзори или да се бара помош од соседите.

– Придобивките од претседавањето се поголеми од овие трошоци и во оваа голема инвестиција сме влегле свесно бидејќи е голема промоција за државата – рече Османи.

За целата оваа „операција“ од буџетот на МНР се планирани 5 милиони евра. Првично биле побарани 8 милиони, но Министерството за финансии ги намалило. Сите активности ќе ги води тим од дваесетина луѓе во Мисијата при ОБСЕ во Виена, од кои 11 се од Македонија, а другите се секундирани дипломати од други земји, кои земјите сами си ги плаќаат, додека во Скопје активна ќе биде „таск форс“ екипата од 7-8 вработени во МНР. Објаснувајќи го мотото „Се работи за луѓето“, Османи вели дека на крајот луѓето се големите консументи и корисници на сето тоа што се прави во политиката.

– Во политиката ние некогаш сметајќи дека се занимаваме со голема политика, со големи иницијативи, со големи интереси, забораваме дека на која било позиција, дали на нашите национални влади, меѓународни организации, остануваме да дејствуваме цел ден за луѓето, за да се намали страдањето пред сè во конфликтните региони, за да им се олесни на луѓето, за да може да се интегрираат, да се рехабилитираат. Имајќи го предвид ова наше искуство, преку нашата мисија, сметавме дека ако некој знае што значи улогата на ОБСЕ на терен и нејзините инструменти – тоа сме ние. И затоа рековме дека пораката што ќе ја испратиме преку нашето претседавање е преку тие состаноци на Постојаниот совет во Виена е дека, да, вие мислите дека правите голема политика, но на крајот луѓето се големите корисници на сето тоа што ние го правиме – рече министерот за надворешни.

Според него, за нас како претседавачи на ОБСЕ е важно што како мала земја во тежок период што ја има првата мисија на ОБСЕ за да спречи конфликт, за да рехабилитира постконфликтно, е мисија што сè уште е активна. Денес созреваме во земја што може да ја предводи целата организација.

Македонското претседавање се случува во една од најтешките години за организацијата, кога по 50 години една земја учесничка ги урива основните начела и основните столбови не само оние на кои почива организацијата, туку и целокупната безбедносна архитектура врз која почива мирот во Европа, Русија ги поткопува тие столбови и тие начела преку агресијата во Украина, со што доведе до голем број последици врз луѓето во тие региони. Токму затоа и првата посета на Османи како претседавач ќе биде во Украина.

– Планирам првата посета како претседавач на ОБСЕ да ми биде Украина, затоа што реков дека Украина веројатно ќе го доминира претседавањето, иако се надевам дека ќе се сменат околностите во текот на годината, па ОБСЕ ќе има една поинаква улога во воспоставувањето на мирот и прекинување на агресијата. Меѓутоа, планирам некаде во средина на јануари првата посета да ми биде Киев, откако ќе ги презентирам на 12 јануари во Виена приоритетите на претседавањето – рече Османи, одговарајќи на новинарско прашање за пораката од руското МНР од 18 декември Скопје да не се движи по патот на Полска, на која не ѝ успеа да постигне консензус.

Тој пред неколку недели добил писмо од рускиот министер за надворешни работи Сергеј Лавров со овие пораки, но дека неговиот одговор и до шефот на руската дипломатија и до сите други е еден и константен – начелата и заложбите на ОБСЕ мора да се почитуваат.