По скандалот со вработувањето на ТВ презентерката Бесмира Ејупи во МНР и обвинувањата за непотизам во ова министерство од страна на ВМРО-ДПМНЕ, од каде открија дека таму се вработила и сопругата на пратеникот од СДСМ Мартин Костовски, министерот Бујар Османи појаснува за последните случувања во неговиот ресор.

„Нема ништо незаконито во вработувањето. Министерството има недостиг на кадар кој ќе се посвети на тешката работа во дипломатија. Нововработените започнуваат со минимална плата и треба години за да напредуваат во кариерата. Тоа е тешка професија, тие се некој вид номади кои цел живот го поминуваат на различни места. Госпоѓата Костовска е преземена од Куманово и сега е на пониска позиција одошто била претходно“, рече министерот за надворешни работи во Студио 10 на ТВ 24.

Османи објаснува дека Ивана Костовска е на постдипломски студии по меѓународна политика во Прага и во нејзиниот случај не станува збор за трговија со влијание.

Во моментов во МНР има оглас за вработување на 16 нови луѓе, а оваа професија бара време за напредување и со оглед дека и критериумите се тешки па нема голем интерес за вработување во Министерството, додава тој.

Министерот Османи појаснува и за случајот со ТВ презентерката Бесмира Ејупи, која извесен период од различни државни институции земала хонорари од 12 илјади евра, а се вработи во МНР откако претходно се зборуваше дека се подготвува за конзул.

„МНР има потреба од 50 вработувања, но сега Министерството за финансии одобри 16. Секој млад човек кој знае јазици и сака да се посвети да конкурира. Ејупи е преземена од Министерството за политички систем, како што по закон се преземаат и други службеници“, вели Османи.

Според министерот, Ејупи знаела јазици и имала безбедносен сертификат од највисок ранг, како член на службата на протокол во министерството во кое претходно работела. За нејзините хонорари од повеќе институции, за кои се води и истрага, Османи вели дека треба да се праша и ВМРО-ДПМНЕ, бидејќи Ејупи била ангажирана и од нејзин градоначалник.

Инаку, според огласот објавен од Агенцијата за вработување, нето-платата на овие 16 државни службеници ќе се движи од 18.582 до 30.596 денари, а за сите е неопходен безбедносен сертификат и тоа од „интерно“, преку „државна тајна“ и „доверливо“ до „строго доверливо“.

Кандидатите освен наведените општи и посебни компетенции, треба да задоволат и дополнителните услови. Од огласот за нови началници, соработници и референти може да се прочита дека 11 треба да бидат Македонци, четворица Албанци и еден Турчин.