Министерот за надворешни работи, Бујар Османи денеска телефонски разговараше со колегата од Саудиска Арабија, принцот Фаисал бин Фархан Ал Сауд. Како што соопшти МНР, во фокус на разговорите биле можностите за продлабочување на билатералните односи, со посебен осврт на економската соработка и трговските врски.

Воедно, Османи се заблагодари за неодамнешната евакуација од Судан на четири државјани на Северна Македонија, како знак на солидарност и потврда на пријателството меѓу двете земји, додаваат од МНР.

Тие говореле и за состојбите во Блискиот Исток, при што Османи ги поздравил континуираните заложби на Саудиска Арабија во насока на постигнување решение на ситуацијата во Јемен.

Од Министерството информираат дека биле разменети мислења и за соработката меѓу двете земји на мултилатерален план, како и за актуелните надворешно-политички прашања и состојби.

Османи минатата година во ноември оствари прва официјална посета на Саудиска Арабија, каде се говореше за презентација на поволностите кои земјава ги нуди за странски инвеститори.