Осигурувањето диоптриски очила од кршење, кражба или загуба е нова услуга која осигурителните компании неодамна ја нудат на српскиот пазар. Долготрајното гледање во екранот има последица сè повеќе деца да имаат проблеми со видот, а дури 40 отсто од граѓаните на Србија носат диоптриски очила. Оттука и не треба да нè чуди што осигурувањето на помагала, без кои за многумина животот и работата се незамисливи, се појави како нова услуга што ја нудат осигурителните компании во Србија – пишува Каматица. Очилата може да ги осигура секој, особено оние кои платиле значителна сума пари за нив, не само поради нивната вредност, туку и поради тоа што не би можеле да ги извршуваат секојдневните активности на работа или дома без нив. Во најголем страв се најсиромашните граѓани кои едвај заштедиле пари за рамки и леќи, бидејќи знаат дека ако ги скршат или изгубат тешко дека би можеле да си дозволат други, а животот без очила им е незамислив. Статистиката покажува дека повеќе од 30 отсто од корисниците се соочуваат со оштетување на нивните очила во првата година од користењето. А како и под кои услови е можно да се осигураат во Србија, Курир побара одговори од осигурителните компании кои работат на домашниот пазар.

Од Уника осигурување потврдиле дека кај нив може да се осигураат диоптриски очила, како и дека со овој вид осигурување се покриваат уништување на очилата како последица на сообраќајна несреќа, случајно оштетување на рамката и леќите на очилата, како и кражба на очила.

– Осигурувањето ги покрива трошоците за поправка на оштетените стакла, како и купување на нови во случај на кражба, кои ќе бидат идентични или слични на украдените. Осигурената сума е до 2.000 евра, со сеопфатно покритие за период од една или две години. Осигурувањето ги покрива сите вредности, без разлика дали се поевтини или поскапи  – објаснуваат од оваа осигурителна компанија.

Посочуваат дека осигурената сума значи дека вкупната сума на осигурената вредност не може да ја надмине таа граница, но под истите услови може да се осигураат и очила со пониска вредност.

– Значи, доколку се поевтини, осигурувањето ќе ги покрие трошоците до нивната реална вредност, а доколку се поскапи, корисникот може да осигура максимална сума до 2.000 евра – објаснуваат од осигурителната компанија.

Од осигурувањето Винер велат дека и кај нив може да се осигураат очила согласно барањето на клиентите, но само за правни лица.

– Нашата компанија може да го понуди ова осигурување на сите заинтересирани правни субјекти, под услови и тарифи кои би ги прилагодиле конкретно според барањето – велат во Винер Србија.