Белгиски вафли се единствени по својот вкус. Однадвор малку крцкаву, а внатре меки… Совршено одат со џем и свежо овошје. Белгиските вафли се одличен сладок избор за почеток на денот, а текстурата на тестото одлично се надополнува со овошје, крем и сирупи… Рецептот не е комплициран, напротив, единствено што ќе ви треба е калап за печење вафли, но штом го набавите – сè друго е брзо, едноставно и вкусно!

Состојки:

– 1 ќесичка сув квасец
– 1/3 чаша (од 250 мл) топло млеко
– 1 лажичка шеќер
– прстофат сол
– 2 чаши брашно
– 3 јајца на собна температура
– 1/4 чаша путер на собна температура (или 60 г)
– 1/4 чаша млеко
– 1 лажица екстракт од ванила
– 1/2 чаша крупен шеќер

Подготовка:

Во еден сад измешајте ги квасецот, 1 лажичка шеќер и топлото млеко и оставете ги 15-тина минути да стаса квасецот.

Додадете го брашното и солта и измешајте убаво со дрвена лажица. Додадете ги јајцата, едно по едно, путерот, млекото и ванилата и мешајте додека не се соединат сите состојки.

Садот во кој се наоѓа тестото покријте го и оставете го да стои на топла собна температура додека не се удвои (околу 1 час).

Сега додадете го крупниот шеќер во тестото. Измешајте убаво. Со лажица земајте од тестото (количината зависи од големината на тостерот за вафли) и ставете ги на врелиот тостер да се печат додека не поруменат убаво од двете страни.

Крупниот шеќер ќе се карамелизира и ќе им даде на вафлите специјален дополнителен вкус, а малку ќе остане и за крцкање.

Овие вафли можат да стојат и до една недела во затворена кутија.