Бизнисменот обвинет во случајот „Плацови на Водно“, Орце Камчев, излегува од затворот „Скопје“ во Шутка, објави „А1он“. Кривичниот совет на Апелација одлучи да ја прифати гаранцијата од скоро 11 милиони евра, а судот ќе му го задржи пасошот на Камчев.

Според Апелација, сега ќе треба да се завршат процедурите за запишување на хипотека, по што Камчев ќе се брани од слобода во случајот „Плацови на Водно“.

Со оглед на тоа дека тој од пред неколку дена е на лекување во болницата „Систина“, каде ја дочека Новата година, Камчев практично нема да се врати во затворот, туку по третманот ќе може да оди директно дома .

Оваа гаранција е за шестпати повисока од онаа која Камчев ја понуди во септември минатата година, кога судот ги одби 1,8 милиони евра. Драстично зголемената гаранција доаѓа откако Сашо Мијалков со скоро иста сума, успеа да ги убеди судиите во Апелација дека нема да избега ако се брани од слобода.