Унгарскиот премиер Виктор Орбан денес изјави дека Унгарија веќе една деценија се штити себеси и Европа од нелегална миграција, откако пред десет години ја „заклучи“ својата граница.

„Тој потег предизвика гнев и закани во Брисел  стигматизација на Унгарија во главните градови на Запад, но ние истрајавме, ја затворивме јужната граница и рековме дека само оние на кои им дозволуваме можат да стапнат на унгарска почва“, рече унгарскиот премиер во објава на Фејсбук, пренесува МТИ.

Орбан оцени дека Берлин, Стокхолм, Виена и Париз биле сведоци на закана за јавната безбедност во последните десет години, додавајќи дека орди мигранти ги тероризираат жителите во тие градови и дека експлозиите и убиствата сега се секојдневна рутина.

„Унгарија стана една од најбезбедните земји во Европа. Бројот на злосторства против човечкиот живот или материјалниот имот е на ниско ниво, а бројот на нелегални мигранти во земјата е нула. Но, бирократите од Брисел сè уште сакаат да управуваат со миграцијата наместо да ја запираат, уценувајќи ги и казнувајќи ги оние што не се покоруваат. Унгарија е казнета со еден милион евра дневно“, рече Орбан.

Тој вети дека унгарската влада, како што вели, ќе продолжи со својот отпор во Брисел и ќе ја зачува Унгарија како земја без мигранти.