Во населбата Карпош 2 ќе се продаде државно земјиште за да изгради катна гаража приватен инвеститор, со капацитет за паркирање на 180 возила. Мнозинството советници од Советот на Општина Карпош на денешната седница, по речиси двочасовна дискусија, дадоа зелено светло за усвојување на измените и на дополнувањата на Програмата за активностите на Општина Карпош во областа на располагањето со градежно земјиште во државна сопственост за 2025 година, во која се предвидува продажбата на парцелата каде што треба да никне гаражата.

Против беа советниците на Левица, кои укажаа дека не треба да се отуѓува земјиштето, туку ако веќе има потреба, Општината самата да ја изгради гаражата, планирана кај новите згради во Карпош 2.

Според градоначалникот Стевчо Јакимовски, во ДУП за Карпош 1 и Карпош 2, кој беше неодамна донесен, се планирани неколку гаражи, меѓу кои и оваа што треба на приземјето да има услужна намена и две подземни и две надземни нивоа за паркирање, но дека Општината нема средства за самата да ги изгради. Тој посочи дека во овие две населби има реален проблем со недостиг на места за паркирање, дека секое семејство има по неколку возила, но дека проблемот е уште поголем што тука има и три факултети.

 Таму пред 20 години се изгради велелепна населба и да немаат паркинг-место, трагедија е кој го дозволил тоа. Второ, тие граѓани ќе треба од приватникот што ќе ја направи да ги купат или закупат паркинг-местата, што нема логика ако ние сакаме да ги услужиме граѓаните да им земаме пари. Сопственикот ќе бара пари за тоа, знаеме колку чини месечна карта. Таму ќе се остварува приход, а граѓаните ќе треба да го платат тоа – посочи Славко Митевски, советник од Левица.

За градоначалникот разбирливо е да се плаќа, исто како што граѓаните што купуваат стан, плаќаат и за купување гаражно место.

Овде сопственикот одлучува дали ќе ги продава тие гаражи или ќе ги дава под наем. Ако стави 200 евра месечно паркирање, никој нема да му купи. Но, добро знаете дека таму нема семејство кое нема по две-три коли. Проблемот е што има повеќе автомобили отколку што сопствениците купиле гаражи, а проблем е и тоа што таму има три факултети, а речиси и да нема студент што не оди со кола. Ние треба да размислиме да бараме од Владата во делот на универзитетскиот кампус да се направи катна гаража, затоа што таму има голем број студенти и професори – рече Јакимовски.

Независните советнички, пак, укажаа дека изградбата на катна гаража не е решавање на проблемот и дека граѓаните треба да се стимулираат повеќе да користат јавен превоз и велосипеди наместо да бидат комотни да паркираат каде што сакаат.

 Ние со ова нема ништо да решиме туку само ќе им дадеме комоција на студентите да доаѓаат со кола. Во Западна Европа се пренаменуваат улици во пешачки зони, а кај нас се дозволило да се изградат згради без да се мисли на паркинг и сега им го решаваме проблемот со тоа што отуѓуваме земјиште за да се гради катна гаража. Јас не се согласувам со продавање земјиште. Студентите треба да се стимулираат да користат јавен превоз и велосипеди – изјави Невена Георгиевска од „Независни за Карпош – За заштита на Карпош“.

Јакимовски реплицираше дека цело време се прави обид да се занемари фактот дека граѓаните со порастот на стандардот имаат две и повеќе возила, дека студенти ретко користат автобус и дека станува збор за густо населени населби каде што има сериозен проблем со паркирањето. Притоа, потсети дека проблем е и тоа што доцна се донел ДУП за овој простор.

 Да го усвоевме порано ДУП и да ни беше готов проектот, сега ќе можевме да аплицираме за владини средства за катна гаража, ама ние се инаетевме со планот и останавме без подготвени проекти во тој дел – рече Јакимовски.

Ни рампи ни зонско не го решаваат хаосот со паркирање, „спасот“ се монтажни гаражи

Деталниот урбанистички план за населбите Карпош 1 и Карпош 2 беше неодамна донесен од советниците и со него се отвора можност за изградба на пет монтажни гаражи. Најголемата ќе биде во близина на Машинскиот факултет, со можност за паркирање 700 возила на приземје и шест ката. Гаража треба да се гради и во Карпош 2 кај МИДА, со 180 паркинг-места, како и во близина на крстосницата на булеварите Партизански одреди и 8 Септември, која ќе биде на приземје и два ката и на неа ќе можат да се паркираат 600 автомобили.

Во ДУП се зацртани маркички за уште две катни гаражи во Карпош 1 и тоа зад кафулето „Рузвелт“ со катност П+2 за 250 возила и на просторот помеѓу полициската станица и Партизанска, каде што ќе бидат обезбедени 250 паркинг-места на монтажната гаража што ќе има приземје и еден кат.

Од Општината велат дека за две гаражи, по една во двете населби, веќе се подготвуваат проектите.