На денешната седница на Советот на која се расправаше за кварталниот извештај беше речено дека во изминатата година и половина, Општината Битола нема поставено ниту една нова клупа, ниту една канта за отпад во градот, а за културни настани „искеширала“ 16 милиони денари.

-Но, затоа во првиот квартал Општината Битола за музејска и кинотечна дејност има издвоено 9 милиони и 600 илјади денари од кои 7 милиони и 400 илјади денари се за Офицерскиот дом во Битола а од програмата за културни манифестации Општината потроши 9 милиони и 700 илјади денари. Или вкупно Општината Битола за култура и филмска дејност во првиот квартал потрошила ни помалку ни повеќе туку 16 милиони денари или над 260 илјади евра. Со тие пари можеа да се направат најмалку четири прифатилишта за бездомни кучиња-истакна претседателката на Битолскиот совет, Габриела Илиевска на денешната седница на која како прва точка на Дневниот ред е кварталниот извештај.

Инаку, во врска со трошењето на општинските пари за културни „проекти“ деновиве имаше остри реакции во битолската јавност. Притоа, беше истакнато дека најголем дел од парите за култура се даваат на членови на ВМРО-ДПМНЕ и блиски лица до локалната власт.

Најголеми критики беа упатени за проектот „Баница 1903“ во Офицерскиот дом во Битола, а на која присуствуваше и лидерот на опозициската ВМРО-ДПМНЕ Христијан Мицкоски.