Општина Гази Баба ќе исплаќа паричната помош за граѓаните погодени од енергетската и финансиската криза како месечен надомест за два месеца и тоа за јануари и февруари 2023 година.

Со социјалниот пакет се опфатени две категории граѓани. Паричната помош за електрична енергија че добиваат социјално загрозени жители на Општина Гази Баба. За оваа парична помош, како што информираат од Гази Баба може да поднесат барање членови на домаќинства кои се корисници на парична помош од социјална заштита.

Два месеци парична помош ќе добиваат и пензионери со пензија до најмногу 15.000 денари, кои исто така треба да поднесат барање за ваков вид субвенција.

И за двете групи граѓани висината на месечната парична помош изнесува 1.100 денари со вклучен персонален данок. Средствата од паричната помош за субвенција за електрична енергија ќе се префрлаат до снабдувачот на електрична енергија ЕВН Македонија АД, додека пак пензионерите ќе ги добиваат на својата трансакциска сметка.

Од Општина Гази Баба информираат дека јавниот оглас е во тек и ги повикува граѓаните од двете категории опфатени со огласот да аплицираат.