Општина Центар денеска објави јавен повик за музичкиот хепенинг „Нешто што ќе остане“, на кој право на учество имаат регистрирани здруженија, организации и правни субјекти со седиште во оваа општина, кои делуваат во областа на културата, уметноста и маркетингот,

За манифестацијата е обезбеден буџет од 1.840.000 денари, а учесниците на повикот, треба да понудат четиричасовна програма со реномирани македонски бендови, соло изведувачи или забавни групи, како и водител со соодветно искуство за ваков вид настани. Дополнително, потребна е и целосна техничка и логистичка поддршка за концертот.

 И оваа година ветуваме добар ритам, позитивна енергија и изведувачи што вреди да се слушаат. Под отворено небо, во Паркот на франкофонија сите заедно ќе уживаме во македонскиот звук – порача градоначалникот Горан Герасимовски.

Рокот за пријавување е седум дена од денот на објавување на повикот, поточно до 18 јули, а апликациите се поднесуваат лично во Архивата на Општина Центар или по пошта.

Од Општината велат дека датумот на одржување на „Нешто што ќе остане“ ќе биде дополнително објавен.