Општина Центар ќе ангажира маркетинг-агенција за информирање на граѓаните за општинските активностите, која меѓу другото ќе има обврска да ги води и да ги уредува профилите на социјалните мрежи, да снима и да продуцира видеа, но и да пишува соопштенија и да го следи медиумското известување поврзано со активностите на Центар. Оттаму тврдат дека соработката со маркетинг агенција е неопходна заради специјализираната експертиза што ја нудат.

Јавниот оглас со кој се бара агенција е во тек и на него заинтересираните фирми можат да се пријават до 14 јануари, за кога е закажано јавно отворање на понудите. Ваков тендер е објавен и во ноември, но е поништен затоа што на него не пристигнала ниедна понуда. За услугите на избраната агенција Општината планира да потроши 1.000.000 денари без ДДВ, а главен критериум за доделување на договорот ќе биде најниската цена.

Во огласот објавен на Електронскиот систем за јавни набавки се наведени и повеќе други услови и критериуми, како што е на пример техничка или професионална способност на идниот економскиот оператор.

Од персоналот што ќе биде вклучен во набавката и кој треба да биде на располагање за цело времетраење на договорот за јавна набавка, економскиот оператор треба да располага со: минимум 3 (три) лица вработени или ангажирани за целото времетраење на договорот за јавна набавка од кои минимум едно лице одговорно за дизајн, едно лице одговорно за социјални медиуми и едно лице одговорно за видеомонтажа – е наведено во огласот, каде што се прецизира и дека договорот ќе трае сѐ додека не се исполнат обврските што ги преземале договорните страни, односно до исцрпување на средствата предвидени за јавната набавка, но не подолго од една година сметано од денот на неговото склучување.

Во техничките спецификации на огласот точно е посочено за што сѐ се потребни услугите на маркетинг-агенцијата, а тоа е креирање и водење профил и пишување содржини на социјалните мрежи во име на Општината, поточно отворање нови социјални мрежи, пишување кратки содржини за секојдневните активности на општината, објавување фотографии, кратки видеа и слично. Исто така, се очекува осмислување и реализација на настани, изработка на фото и графички дизајни преку кои ќе се информира за одредена субвенција, мерка, реконструкција или инвестиција, како и изработка на видеа за социјалните мрежи за одредена активност. Избраната агенција треба да осмисли и реализира и комуникациска стратегија што опфаќа пишување соопштенија за јавност, следење на медиумите и порталите и на нивното известување за проекти од интерес за граѓаните на Центар.

Од списокот на вработени, јавно достапен на страницата на Општина Центар може да се види дека само во одделението за односи со јавност и информирање на граѓаните се вработени осум луѓе, а уште неколкумина вработени се наведени во Секторот за поддршка на градоначалникот. Неминовно се наметнува прашањето зошто тогаш ѝ е потребно на Општината да троши пари за ангажирање маркетинг-агенција, која ќе ја врши работата за која вработените земаат плати. Исто, како што не беше јасно зошто сите општини и Градот Скопје трошат големи суми од буџетите за адвокатски услуги кога сите имаат сектори за правни работи и вработени правници.

Соработката со маркетинг-агенција е неопходна заради специјализираната експертиза што ја нудат. Маркетинг-агенциите располагаат со професионалци, кои се специјализирани во графички дизајн, видеопродукција, социјални медиуми и ПР-стратегии, овозможувајќи поквалитетна и попрофесионална реализација на проектите. Дополнително, тие имаат пристап до напредни софтвери, опрема за снимање и алатки за висококвалитетни кампањи, како и капацитет за преземање посложени проекти, додека вработените во општината на овој вид проблематика се фокусираат на клучните дневни активности, одговараат на прашања од новинари и медиуми, ги комуницираат ставовите и одлуките на институцијата, по потреба во консултација со агенцијата – објаснуваат од Општина Центар.

Општините трошат илјадници евра: Имаат правни сектори, но во сложени судски постапки ги бранат адвокати

Соработка и договори со маркетинг-агенции оваа општина имала и во изминатите речиси три години. Во периодот од август 2022 до август 2023 година ваквите услуги ги вршела агенцијата „Њу медиа маркетинг“. Вредноста на реализираниот исплатен договор со вклучен ДДВ со оваа фирма изнесувал 700.920 денари. На Друштвото за производство, услуги и трговија „Техносан“, пак, кое било ангажирано во периодот од ноември 2023 до ноември 2024 година, Општината, според договорот му исплатила 638.620 денари со вклучен ДДВ.

Од она што може да се види на Електронскиот систем за јавни набавки, ангажирање маркетинг-агенција за информирање на граѓаните не е практика на останатите девет скопски општини и на Градот Скопје. Во изминатите три години ниедна од нив ниту објавила јавен оглас ниту склучила договор со фирма што ќе се занимава со комуникациска стратегија и информирање на граѓаните.