Општина Центар објави јавен повик на кој можат да се пријават сите студенти и апсолвенти на државни, меѓународни и приватни факултети, кои се жители на Центар,  за да остварат практикантство во Општината: Доколку бидат избрани ќе добиваат и месечен надомест.

Со јавниот повик за практиканство сакаме да привлечеме што повеќе студенти и апсолвенти коишто се наши жители на Центар, да ни се приклучат во тимот на Општината и преку волонтирање и практиканство да стекнат одредени знаења и навики. Им отвораме врата и можности за понатамошно останување и работење во Општината – изјави градоначалникот Горан Герасимовски.

Вкупно ќе бидат избрани осум практиканти од оние кои аплицирале на повикот, кои ќе започнат со работа на 1 јуни и ќе имаат можност шест месеци да работат во Општината со месечен надоместок во износ од 15.000 денари нето.

Герасимовски очекува дека повикот ќе наиде на голема заинтересираност и дека во следните шест месеци младите ќе имаат можност што повеќе да научат во делот на општинското работење.

Јавниот повик е отворен до 29 мај, а заинтересираните студенти освен барање треба да поднесат и доказ дека се студенти или апсолвенти, лична карта и трансакциска сметка и да приложат кратка биографија.

За сите детали околу јавниот повик заинтересираните можат да се информираат на веб страната на Општина Центар.