Од Општина Аеродром информираат дека денеска локалната самоуправа изрекла прекршочна казна на ЈП „Комунална хигиена – Скопје“ во износ од 88.000 евра.

Како причини за оваа висока глоба од Општината ги наведуваат континуираното нефункционирање, несоодветното собирање отпад и негрижата за јавната хигиена на нејзината територија од страна на градското претпријатие.

ФОТО | Нова минидепонија близу Железничка – двоседи, веце школка, искршени контејнери…

Оттаму велат дека санкцијата не е политичка, туку е резултат на утврдените пропусти во нивната работа и многубројните поплаки од страна на жителите за неподносливата миризба и нечистотијата во нивните населби.

-Оваа санкција не е политичка, туку институционална како резултат на утврдени пропусти во работата на претпријатието. Дополнително, жителите на Аеродром секојдневно се обраќаат до Општината со поплаки за преполни контејнери, неподнослива нечистотија на улиците во сите населби, иако редовно и уредно ги плаќаат комуналните давачки секој месец- велат од локалната самоуправа.

Претходно, Општината и ЈП „Комунална хигиена“ неколку пати си ја префрлаа топката околу надлежноста за тоа кој треба да ги исчисти мини-депониите кои се појавуваа на повеќе локации низ Аеродром.

Комунална: За чистење на депонијата кај Железничка е надлежна Општината, нашите обврски се исполнети

Од Општината најавија и предупредија дека и по оваа изречена казна, Општината ќе продолжи со засилен надзор и санкции за сите кои не си ја извршуваат својата работа.