Имаме опожарени седум викенд куќи, а едно лице пред еден час е примено на „Токсикологија“ во државна болница, вели во изјава за „Слободен печат“ градоначалникот на општината Чучер Сандево, Сашко Комненовиќ, каде што неколку дена беснеат пожари.

Иако директорот на Дирекцијата за заштита и спасување Стојанче Ангелов во последната изјава снимена за медиумите кажа дека нема изгорени викенд-куќи и дека не е точно дека имало опасност за манастирот Свети Никита, градоначалникот излезе со други информации.

– Директорот не знае што зборува. Јас сум тука трет ден, дома не сум појден, имаме седум опожарени викенд-куќи и на место викано Голиово. Манастирот Свети Никита во моментов не е во опасност. Имаме противпожарно возило кај него, имаме луѓе од граѓаните кои живеат во непосредна близина, но во текот на вчерашниот ден беше во опасна состојба, беше многу блиску пожарот до самиот манастир. Пред два часа имавме пожар во Кучевиште, го локализираме и се сомневаме дека е подметнат. За воените возила гледав и слушав од медиумите, искрено не знам како функционираат, видов неколку тука – вели градоначалникот.

Вели на терен има пожарникари, но теренот е непристапен.

– Доброволци има на терен многу, сè што е здраво, живо и подвижно гаси. Пожарот во моментов е активен, го држиме под контрола, но како ќе се зголемуваат температурите можно е да се зголеми интензитетот на пожарот – додава градоначалникот.