Српскиот кантавтор Оливер Мандиќ не дојде како гостин на фестивалот „Охрид фест- Охридски трубадури“ и покрај тоа што организаторите му платија авионски карти и сместување за него и за неговото семејство, по претходен договор.

„Мандиќ не дојде со образложение дека го пропуштил летот од Белград до Скопје. Со сопругата и со ќерката, требаше да пристигнат во четвртокот (28 август) на аеродромот во Скопје. Возач ги чекаше да ги донесе во Охрид, но на аеродромот не се појавиле. Кога го побаравме, рече дека авионот полетал 12 минути порано, а тие наводно за да ја избегнат гужвата сакале да влезат последни. Кога го прашавме каде му е багажот, одговори дека му го вратиле, што е уште еден чуден изговор“, ни рекоа од организацијата на фестивалот.

Трите повратни билети, на Мандиќ му биле испратени уште на 4 август, по пртеходни договори со директорот на фестивалот Григор Копров и дел од организацискиот тим. Тој лично побарал да лета од Белград до Скопје, а не до Охрид, поради ноќните линии кои не му одговарале.

„Оливер Мандиќ требаше да дојде и да прими награда за безвременски хит за песната ‘Питају ме питају’. Ми потврди уште во јуни, и оттогаш бевме на линија. Го испочитувавме максимално, му беше резевриран луксузен апартман за него, за сопругата и за ќерката и повратни авионски билети. На крајот ми рече дека го пропуштил авионот и ми побара да му пратам возач да го земе од дома, но јас одбив. И таа опција му беше понудена претходно, но тој инсистираше да не дојде со автомобил, туку да летаат до Скопје.

Фестивалот успешно се одржа и без него, а јас ги чувам билетите кои пропаднаа, и сметката за трошоците, за секој случај“, вели композиторот Григор Копров.

„Питају ме, питају“, беше еден од првите хитови на Мандиќ, песна со која победи на фестивалот МЕСАМ во Белград во 1984 година. Тој победи на истиот фестивал и во 1985 со песната „Помагајте другови“, по што стана многу популарен во поранешна Југославија. Пошироката публика дозна за Оливер Мандиќ преку ТВ-шоуто „Белград ноќе“ кое се емитувало во 1981, кога тој го објавил првиот албум. Во 1991 година Оливер Мандиќ кратко време бил член на легендарната група „Рибља Чорба“. Тој и бендот го снимиле материјалот за албумот „Лабудова песма“ во Виена во 1991 година, но поради кавга со покојниот Бора Ѓорѓевиќ, соработката била прекината. Мандиќ ја напишал музиката за филмовите „Национална класа“ и „Последниот круг во Монца“.

Во март годинава, тој имаше операција на р’бетот во Белград. Победник на „Охрид фест“ од гласовите на публиката е срспскиот пејач со македонско потекло Ангело. Второто место го освои Ивона Јо, а третото дуетот Дорис Димовска и Наум Бумбаровски. Еден од специјалните гости беше хрватскиот рокер Дадо Топиќ, кој прво настапи во дует со младата македонска пејачка Ана Петан, а потоа заедно со сите учесници ан сцената го испеа неговиот голем хит „Македонија“.