По 114 дена војна, околу 80 отсто од тунелната мрежа на Хамас под Појасот Газа сè уште останува недопрена, пишува Волстрит журнал.

Повикувајќи се на израелски и американски претставници, весникот наведува дека е тешко да се процени колку подземни лавиринти досега се уништени од израелските војници.

Од почетокот на копнената офанзива на крајот на октомври минатата година, по ненадејните прекугранични напади на палестинските екстремисти, предводени од Хамас, на 7 октомври, беа убиени околу 1.200 луѓе, а околу 250 заложници беа киднапирани и однесени во Газа. Израелските сили се обидоа да ги уништат тунелите, откривајќи сè поголема подземна мрежа на таа исламистичка организација.

Некои тунели се бомбардирани, некои поплавени, но процесот е бавен бидејќи тунелите се проверуваат дали имаат бомби и заложници пред да бидат уништени.

Се верува дека лидерот на Хамас во Газа, Јахја Синвар и други команданти на организацијата се кријат под земја.

Весникот цитира неколку израелски официјални лица дека Синвар е во команден центар во тунел под Кан Јунис, најголемиот град во јужниот дел на Појасот, и дека таму има заложници.

На почетокот на јануари беше објавено дека високи претставници на израелската одбрана проценуваат дека вкупната должина на тунелот е од 560 до над 700 километри, потсетуваат израелските медиуми.