Во тек се подготовките за најновото, 29-то издание на Интернационалниот музички фестивал „Охрид фест“, што ќе се одржи на 2 и 3 септември.

Како што најавија организаторите, на 2 септември, на сцената на Долни Сарај во Охрид, на Фолк вечер ќе настапи домашната фолк-елита, свое шоу ќе има популарниот пејач од Србија – Мирослав Илиќ, сопственикот на „Божанствена жено“, „Није живот једна жена“, „Још те нешто чини изузетном“, „Поломиќу чаше од кристала“…), а на втората фестивалска ноќ, на 3 септември, ќе видиме многу атрактивни музички имиња од Балканот.

Од Србија доаѓаат Кики Лесендриќ и Срѓан Марјановиќ, од Хрватска – Владо Калембер, Златко Пејаковиќ, Теди Грубица и Јурица Паѓен („Аеродром“ „Азра“, „Парни ваљак“), од Босна го имаме Ален Исламовиќ, словенечките музичари се Божидар Волф, Инес Ербус& Давид Амаро, од Бугарија ќе го видиме дуото „Expose“, од Албанија – Рина Рамадани и гостинот од Грција е Толис Дамјанос.

Наградите за промоцијата на музиката на Балканот се доделуваат на Мирослав Илиќ, кој ќе има свој мини концерт во фолк вечер и нашиот Гарабет Тавитјан, кој ќе го видиме во Интернационалната вечер.

– Бастионот на убавата македонска песна „Охрид фест“, годинава ќе понуди одлична фолк и интернационална вечер, каде на 2 и 3 септември ќе настапат докажани музички имиња и, бидејќи ги охрабруваме новите музички сили, даваме можност дебитантите да ја започнат музичката кариера токму од Охрид – вели првиот човек на „Охрид фест“, Григор Копров.

Традиционално, водителите на фестивалот се Каролина Петковска – во Фолк вечерта и Маријана Станојковска и Васил Зафирчев во Интернационалната вечер, кога ќе настапат многу интересни имиња.

Советот на фестивалот најавува уште многу изненадувања.

Од најубавата сцена на Балканот – Долни Сарај, фестивалот директно ќе го пренесува националниот сервис, МРТВ, а преносот ќе го емитуваат над 10 телевизии од Балканот.

Комерцијална објава