Виетнам планира да евакуира повеќе од 250.000 луѓе пред доаѓањето на тајфунот Буалој, за кој се очекува да го погоди централниот регион за производство на челик во земјата.

Бурата, десетта што го погодува Виетнам оваа година, моментално е на брегот и генерира ветрови со брзина од над 130 км/ч. Се очекува да стигне до копното во 19:00 часот по локално време, соопшти метеоролошката агенција, пренесе Ројтерс.

Државните медиуми објавија дека Дананг, најголемиот град во централен Виетнам, планира да евакуира повеќе од 210.000 луѓе. Околу 32.000 луѓе ќе бидат евакуирани од крајбрежниот град Хуе и 15.000 од градот Ха Тин.

Речиси 117.000 војници беа мобилизирани во пресрет на бурата. Четири национални аеродроми беа затворени, а сите рибарски бродови на патот на тајфунот беа повикани во пристаништето.

Според Министерството за земјоделство, повеќе од 100 луѓе загинале или исчезнале во Виетнам поради природни катастрофи во првите седум месеци од 2025 година. Економските загуби се проценети на 21 милион долари.