Сопственикот на италијанскиот шампион, Аурелио Де Лаурентис прв ја соопшти веста, а потоа и Наполи ја потврди истата.

Поранешниот тренер на Рома, Лучијано Спалети по три децении успеа да ја врати титулата во Серија А во Неапол, по што реши да го напушти кормилото на „наполитанците“.

Сопственикот на Наполи брзо реагираше и на негово место донесе уште еден поранешен тренер на римската „волчица“ – Руди Гарсија.

Французинот до неодамна работеше во Саудиска Арабија со Кристијано Роналдо, но Ал Наср реши да му даде отказ, незадоволен од постигнатите резултати.

Гарсија од следната сезона ќе го води Наполи на македонскиот репрезентативец Елиф Елмас, што го потврди и сопственикот на клубот на својот Твитер профил.

– Задоволство ми е да објавам дека Руди Гарсија ќе биде новиот тренер на Наполи откако го запознав и поминав време со него во последните 10 дена. Му посакувам искрено добредојде и сè најдобро – стои во објавата на Де Лаурентис.