Германскиот кошаркарски клуб Баерн Минхен и тренерот Пабло Ласо постигнаа договор за раскинување на соработката.

Според извештаите, Ласо побарал да го напушти клубот поради семејни причини.

– Одлуката на Пабло беше неочекувана, но ние многу го почитуваме како тренер и како личност и сакаме да му се заблагодариме за работата и големата посветеност во изминатата, успешна сезона. На Пабло му посакуваме сè најдобро во иднина, тој секогаш ќе биде поврзан со нас, не само поради двојната круна – изјави генералниот директор на Баерн, Марко Пешиќ.

Ласо (56) штотуку ја заврши првата сезона од двегодишниот договор. Минатата сезона го предводеше Баерн до титулата шампион на Германија и трофејот во националниот куп, додека за тој клуб во Евролигата забележа 13 победи и 21 пораз.

Пред Баерн, Ласо беше на клупата на Реал Мадрид од 2011 до 2022 година, со кој, меѓу другото, освои две титули во Евролигата (2015 и 2018 година).