Манчестер јунајтед го потврди првото големо летно засилување, откако денеска официјално го претстави Матеус Куња како ново име во својот состав. Бразилецот пристигнува од Вулверхемптон во трансфер вреден 62,5 милиони фунти и потпиша договор на пет години.

Трансферот беше најавуван неколку дена наназад, а сега „црвените ѓаволи“ преку социјалните мрежи и формално го потврдија ангажманот на напаѓачот, кој треба да внесе свежина и ефикасност во офанзивниот дел на тимот.

Јунајтед зад себе има тешка сезона, која ја заврши на разочарувачкото 15. место во Премиер лигата со само 42 бодови, а дополнителен удар беше и поразот од Тотенхем во финалето на Лига Европа.