Eкипата на македонскиот шампион Еурофарм Пелистер се раздели со уште еден ракометар.

Битолскиот тим го напушти и Данецот Андреас Јохан Нилсен, објавија утрово од таборот на пелистерци.

РК Еурофарм Пелистер ја известува јавноста дека спогодбено го раскина договорот со данскиот интернационалец Андреас Јохан Нилсен. Кружниот напаѓач ова лето пристигна во Битола и ја одработи полусезоната со македонскиот шампион. 26-годишниот Нилсен настапи во „зелено-белиот“ дрес во Суперлигата, Купот и Суперкупот на Македонија и Лигата на шампионите и покажа професионален пристап и ангажман.

Сепак, заради професионален предизвик и враќање во татковината, Нилсен пред истекот на договорот се разделува со нашиот клуб. РК Еурофарм Пелистер му се заблагодарува за периодот минат во нашиот клуб, нашиот град и нашата земја. Искрено му посакуваме успех во следниот предизвик и нашиот клуб секогаш ќе биде отворен за соработка за професионалци како Андреас Нилсен“, објави битолскиот клуб.

Еурофарм Пелистер првиот дел од сезоната го заврши на второто место во групата и во плеј-офот пренесува два бода.