Реал Мадрид и Борнмут постигнаа договор за трансфер на Дин Хујсен, кој ќе го носи дресот на шпанскиот фудбалски клуб во следните пет сезони, од 1 јуни 2025 до 30 јуни 2030 година.

На своите 20 години веќе е шпански репрезентативец и играше во италијанската Серија А за Јувентус и Рома, како и во Премиер лигата со Борнмут.

Хујсен е номиниран за наградата „Млад играч на годината“ во Премиер лигата за 2024-2025 година.

Сезонава за Борнмут во најсилната англиска лига запиша 30 настапи и три голови.

Хујсен играше за националните тимови на Холандија до 16, 17 и 18 години, но лани ја избра Шпанија.

Хујсен е првото летно засилување, а наскоро се очекуваат доаѓањата на новиот тренер Чаби Алонсо и новиот играч Трент Александер-Арнолд.