Од 5 часот утрово има одрон на патниот правец село Живалево – село Туралево, поради што сообраќајот се одвива наизменично по една коловозна лента, информира АМСМ.

Од 3:40 часот е укината забраната за движење на тешки товарни возила кон превојот Стража.

Сообраќајот на државните патишта во земјава се одвива непречено, по влажни коловози, со умерен интензитет на возила. На граничните премини од македонска страна нема подолги задржувања при влез и излез од државата.

АМСМ апелира возачите да ја прилагодат брзината на условите на патот, да ја почитуваат сообраќајната сигнализација и да возат внимателно, особено на делниците низ клисури, речни долини и котлини каде што постои зголемена опасност од одрони. Најризични се делниците Катланово – Велес, Маврово – Дебар – Струга, Виница – Берово и Кочани – Делчево.