Актуелниот градоначалник на Кисела Вода и кандидат за градоначалник на Скопје од ВМРО-ДПМНЕ рече дека некој упорно го потпалува градот и дека за тоа мора да има одговорност.

Тој во ,,Утринско еспресо“ на Радио Лидер, рече имаат „борба со нелуѓе коишто за да профитираат политички се во состојба да загрозат и човечки животи“.

„Тоа и претседателот на Владата го кажа вчера, кој од сето ова профитира, и на кого му одговара ваква состојба да го доведе народот во заблуда и ова да биде главна тема“, рече Ѓорѓиевски.

Според Ѓорѓиевски, доколку имало еден ваков случај, тогаш можело да се прават разни претпоставки, но вели дека истрагата треба да биде насочена и да се открие кој профитира од овие настани.

„Еве ако немаше на другите позиции материјален доказ, сега има материјален доказ. И евидентно е дека треба истрагата да оди во насока да се види на кого сето ова му одговара. Да се случеше еден случај ваков, и да имаше снимка од тој случај тогаш можеме ние разни претпоставки да имаме која е причината за сето тоа“ вели Ѓорѓиевски.

„Последователно во период од 20 дена каде што на одредени политички партии и групации, главна кампања им е загадувањето во Скопје за којшто имаа шанси години наназад да извлијаат и да ја подобрат состојбата. Тоа да им биде целодневна преокупација, и само за истото да говорат и да имаат по неколку јавни настапи, тогаш мислам дека јасно треба да ни е на сите. Само објективно согледувам кои се фактите и кој од ова може да профитира. На кого ова му оди во прилог“, заклучи Ѓорѓиевски.