И доверителите и должниците се воздржуваат да покренат стечајна постапка, оти ако се работи ќе има пари и за едните и за другите. Експертите и стечајните управници, кои ги консултираше „Слободен печат“, велат дека нема сигурни показатели дали годинава ќе не заплисне поголем стечаен бран, а се зависи од времетраењето на кризата и дали ќе се  подобри финансиската состојба на компаниите.

Бројките на „Бизнис мрежата“, покажуваат дека лани биле отворени 309 стечајни постапки, за разлика од 2019 година, кога имало 438. Ликвидирани биле 910 компании, а во 2019 година – 1.151, објаснува за „Слободен печат“, Огнен Огненовски, сопственик на „Бизнис мрежа“.

Огненовски, напоменува дека Владата во текот на 2020 година, условно ја замрзна можноста за покренување на стечајна постапка, а тоа траеше неколку месеци.

-Воедно и најпогодените компании добија финансиска помош, што на некој позитивен начин, влијаеше врз одлуката да дел од бизнисмените не го затворат својот бизнис – дополнува Огненовски.

И Богољуб Макревски, стечаен управник со долгогодишно искуство за „Слободен печат“, открива дека лани имале многу помалку предлози за покренување стечај. Овие правници, немаа воопшто работа во текот на 3 месеци од 2020 година, поради владината Уредба. Но, нивните раце беа „врзани“ , речиси до крајот на минатата година, бидејќи фирмите кои земаат финанска помош за плата, не смеат да отпуштаат работници да покренуваат стечај.

-Дали годинава ќе имаме зголемување на стечајните постапки е тешко прашање, но се забележува поголема воздржаност и од доверителите и од должниците. За сите е подобро, компаниите да живеат и работат, со што ќе ја одржуваат ликвидноста. Одлуката за банкрот е тешка и сите се трудат да ја одложат до последниот миг, па дури и самите сопственици на компаниите, се потешко се решаваат на ваков чин – посочува стечајниот управник Макревски.