По победата против Луксембург, македонската женска одбојкарска репрезентација денеска се соочи со сурова реалност. Во вториот натпревар од Сребрената европска лига, нашите одбојкарки беа поразени од Швајцарија со 3-0 во сетови (25-7, 25-16, 25-6).

Швајцарките доминираа од почеток до крај, не оставајќи простор за изненадување. Македонија тешко се снаоѓаше на теренот, особено во првиот и третиот сет, каде што освои само по седум, односно шест поени. Единствено нешто повеќе отпор „црвено-жолтите“ прикажаа во вториот сет, кој заврши со 25-16.

Најефикасна во нашиот состав беше Стојовска со седум освоени поени, но тоа не беше доволно да се избегне високиот пораз.

Следен предизвик за македонската репрезентација е вториот турнир во Сребрената лига кој ќе се одигра на Фарските Острови, каде што ќе се соочиме со домаќинот и со селекцијата на Австрија.