Прашокот, односно брашното од „куќниот штурец“ од вчера и официјално може да се продава на европскиот пазар, а листата на производи во кои е дозволено да се најде практично нема крај. Во ограничени количини може да се користи за производство на: леб, пецива, бисквити, житарки, замрзнати пици и други тестенини. Дозволено е и во зачини, пиво, инстант супи, замени за месо, сосови, преработки од компири, јадења од мешунки и зеленчук, кондиторски производи…

За воведувањето на високопротеинско брашно на база на инсекти во исхраната на Европејците се зборува долго време. Врз основа на мислењето на Европската агенција за безбедност на храната (ЕФСА), прашокот за куќен штурец (Aхета доместикус) е безбеден, а во таканаречената нова храна беше вклучен на почетокот на јануари годинава, објави Политика рс.

Така виетнамската компанија „Крикет Уан Ко“ доби зелено светло да го продава на пазарот на ЕУ во следните пет години. Пржените штурци наводно имаат вкус на јаткасти плодови, главно лешници, но и семки од сончоглед. Експертите тврдат дека тие се богати со железо, амино киселини и содржат повеќе од 60 грама протеини на сто грама. Во јавноста и на социјалните мрежи бурни реакции предизвикуваат информациите дека храната ќе се збогатува со овој вид протеини, а за тоа практично нема ни да знаеме.

Доминантниот став на потрошувачите во Европа е дека не сакаат да конзумираат инсекти – во каква било форма. Експертите во Литванија, на пример, сметаат дека стравувањата на граѓаните се неосновани, бидејќи производството на ова брашно се уште е скапо и прашање е колку навистина ќе биде во масовна употреба. Националната служба за храна и ветеринарство во Литванија за медиумите изјави дека штурците и другите инсекти се третираат како нова храна во ЕУ, што е предмет на построги барања и има јасни ограничувања за тоа колку прашок може да се додаде на друг производ.