Дел од жителите на комплексот згради „Урбан гарден“, кои немаат купено гаражно место во подземните гаражи, како и вработените во фирмите што функционираат во приземјето на зградите, веќе две недели не можат да влезат на отвореното и уредено паркиралиште пред зградите и возилата ги оставаат каде што ќе најдат место на околните улички.

На крајот од минатиот месец екипи на ЈП „Улици и патишта“ поставија заштитни столпчиња во должина на тротоарот покрај булеварот „Трета македонска бригада“, со што затворија еден од влезовите на паркингот, како што велат од безбедносни причини, затоа што на паркиралиштето се влегувало преку пешачки премин.

Заштитните столпчиња на булеварот „Трета македонска бригада“ се поставени согласно записник за извршен инспекциски надзор од Град Скопје. Според увидот извршен од нивна страна, констатирано е дека поставувањето на заштитните столпчиња на овој потег е неминовно и задолжително, токму поради потребата од нивната функција, а тоа е спречување на непрописно паркирање на возилата што ги блокираат пешачките површини на овој потег. Во однос на поплаките од граѓаните од околните згради за блокирање на паркинг локацијата, утврдено е на терен дека пристап имаат возилата од сервисната улица одзади зградите – велат од „Улици и патишта“.

Оттаму апелираат до граѓаните и до учесниците во сообраќајот да не се оштетува сообраќајната опрема и да се почитуваат правилата за безбедно и непречено одвивање во сообраќајот, како и за прописно паркирање на возилата.

И навистина, на овој паркинг има уште два влеза од улицата зад зградите, но на нив се поставени рампи, кои ниеден од станарите нема право да ги подигне. Поради тоа, како што велат жителите, кои се пожалија во нашата редакција, паркингот не можат да го користат ниту вработените во фирмите, ниту можат да пристапат возила на Итна помош или на Пожарна во случај на потреба.

Од двете страни има рампи, а далечинското од рампите е кај вработените во фирмата управител „Дом 365“. Значи, недостапно е за никого од станарите и непристапно за никакви возила. Огромен паркинг стои празен, а ние немаме пристап до него. Првите денови откако ги ставија столпчињата, можевме да влегуваме преку мала уличка низ автосалон со перална, кој ни дозволуваше оттука да поминеме. Потоа некој ставил бетонски пречки и на оваа уличка и сега, буквално нема пристап – раскажуваат граѓаните.

Станарите што се засегнати од ваквата ситуација, се сомневаат дека сето ова со рампите се прави по желба на неколку помлади жители на зградите со мали деца, кои се надеваат дека на овој простор ќе се направи детско игралиште, ќе се засади зеленило и ќе се постават клупи.

Деновиве тие садеа некои дрвца, а бидејќи паркингот е празен, сега е милина за нивните деца што тука слободно си возат велосипеди, без оглед што нивните соседи имаат сериозен проблем. Вакво самоволие не е ни чуено, ни видено, веќе не знаеме каде да се пожалиме и каде да реагираме – велат тие.

Од фирмата управител потврдуваат за „Слободен печат“ дека никој од станарите не може да влезе на паркиралиштето, но не даваат објаснување кој им наложил или им дал право тоа да го прават.

Никој од станарите не може да влезе на паркингот, ние ги подигаме рампите кога има потреба, на пример кога треба да се направи некаква достава за фирмите. Инаку, таму треба да се паркираат вработените на фирмите, ама засега нема таква можност. Тоа е општинско земјиште – велат од „Дом 365“ а на прашањето дали општината им дала таков налог, неодредено одговараат дека е така и тоа по пријава на некои од жителите.

Градоначалникот на Општина Аеродром, Дејан Митески, вели дека таква забрана од нивна страна не е дадена, но и дека до нив не е стигната пријава од некои од жителите дека имаат некаков проблем со паркирањето.

Ниту сме дале таква забрана ниту имаме право да забраниме. Дел од паркингот е во приватна сопственост на станарите, а веднаш покрај улицата е државна сопственост. Значи тие што си купиле гаражно место, тоа е во нивна сопственост, но приодите откај рампите, земјиштето, тие се во заедничка сопственост на станарите – објаснува градоначалникот.

Според податоците од Агенцијата за катастар, кои се јавно достапни, дел од паркингот пред зградите е на парцела на зградите, додека останатиот од над 2.000 метри квадратни е имот на државата.

На целиот тој простор е уреден паркинг, до кој поради заштитните столпчиња и рампите управувани од фирмата управител, никој нема пристап.