Министерството за транспорт на Црна Гора ја отфрли можноста за вклучување на Србија во тековниот тендер за 30-годишни концесии над аеродромите во Подгорица и Тиват и истакна дека за време на тендерската постапка немало ниту официјални, ниту неофицијални иницијативи од српските институции или нивни претставници. Коментирајќи ја работата на Тендерската комисија за концесии над аеродромите во Подгорица и Тиват, опозицијата објави дека просрпските партии на власт намерно го уништуваат тендерскиот процес со цел да создадат услови за влез на Србија, наведува Министерството во соопштение, објави агенцијата Мина.

Одговарајќи на прашањето дали е можно Србија да биде вклучена во постапката за концесија и дали на тоа укажува неодамнешната изјава на нејзиниот министер за финансии, Синиша Мали, дека Србија е заинтересирана за концесија на два меѓународни патнички аеродроми – во Подгорица и Тиват, црногорското Министерство соопшти дека за време на тендерската постапка не дошла никаква официјална или неофицијална иницијатива од српските институции.

Министерот за финансии на Србија, Синиша Мали, неодамна изјави дека Србија е заинтересирана за концесија на два меѓународни патнички аеродроми во Подгорица и Тиват, за кои обидите на државата Црна Гора траат веќе неколку години. „Иако претседателот Александар Вучиќ и јас јасно ја изразивме нашата намера пред сегашните лидери во Црна Гора неколку пати, за жал, не почувствувавме расположение да се вклучиме во овој процес. Исто така, во таа прилика, истакнавме дека сме подготвени да инвестираме двојно повеќе од она што е предвидено во сегашниот предлог за концесискиот договор“, рече Мали, објави Н1 Инфо.