Македонија може да оствари 1 милион ноќевања од автокамперскиот туризам, но актуелните статистички податоци се поразителни – само 535 туристи од кои 281 домашен и 254 странски, во јуни решиле да кампуваат во Македонија! Последните туристички статистички бројки се поразителни и го потврдуваат фактот дека љубителите на ваквиот начин на одморање, во широк лак ги заобиколуваат домашните автокампови, кои поодамна добиваат лоши критики и квалификации.

Побарав цена за да преноќам сам, една ноќ, во Градиште во мое шаторче. Почнаа да ми пресметуваат, ваква такса, онаква такса… испадна повеќе од седумстотини денари. Преноќив во хотелче во Охрид за илјада и двесте денари. Кампинзите во Македонија се катастрофа и не нудат ништо друго освен секаков вид такси. Затоа љубителите на кампување кампуваат диво – стои во една од критиките за автокамповите во земјава на Фејсбук.

Со години на повеќе места низ државата никнуваат диви кампови, но месецов бевме сведоци на дури две полициско-инспекциски интервенции за дислокација и тоа во два Национални паркови – Галичица (во месноста Рајца, село Љубаништа) и во месноста Дешат, кај селото Жировница во Маврово. Така на средината на јули на една од најубавите охридски плажи во селото Љубаништа беа најдени повеќе од 20 диви кампери, кои ја загрозуваат животната средина. Беа затекнати и неколку несоодветно направени септички јами, со што дополнително се загадува животната средина. Наредено им е да се дислоцираат, напишани се мандатни казни и соодветни пријави. Во акцијата беше вклучен и булдожер што извршил некои зафати на парцелата во сопственост на РСМ, за понатаму да се оневозможат дивите кампери да се населуваат на тоа место и да ја загрозуваат убавината на една од најубавите плажи на источното крајбрежје на Охридското Езеро, информираа од НП Галичица. Во истиот период беше поставен и првиот камп на група странски државјани на планинските падини на Дешат над селото Жировница. Управата врз основа на надлежностите и дека гостите биле сместени во зоната пред планинскиот појас на пасиштата, пограничен појас и Зона на строга заштита на територијата на Паркот и мерките за забрана за движење во шума, биле искористени како доволен аргумент за нивно раселување во месноста Црн Камен во Маврово.

Сите што поставуваат шатори или камп-приколки вон организираните кампови се натрапници и узурпатори на државен или на приватен имот во државата, па поради тоа и се случија полициските интервенции. Ова треба да биде опомена и уште еден показател дека треба да се забрзаат иницијативите за нови и европски уредени автокампови во државата. Според законот, кампувањето и палењето огнови е забрането во границите на природното наследство. Уште поголем проблем е загадувањето на животната средина, бидејќи на локациите на кои се сместуваат дивите кампери, нема санитарни јазли, канализација и вода за пиење. Во тек е и забраната за престој во шумите и поради опасноста од пожари, кои за час може да пеплосаат големи зелени површини. Голем број странски кампери во недостиг на доброорганизирани, уредени и промовирани кампови во Македонија се решаваат на диво поставување на својата опрема или, пак, ја сметаат земјава како транзитна – објаснува за „Слободен печат“ Љупчо Јаневски, директор на Агенцијата за промоција и поддршка на туризмот.

Јаневски најавува дека за подобрување на состојбите во тек е усогласување на законите за градежно земјиште и за автокамповите, со што ќе се допрецизираат одредени нејаснотии и за многу кусо време АППТ и Министерството за транспорт и врски ќе излезат со подобрена верзија на актуелниот Закон за автокампови, кој патем речено датира од 2014 година.

Поради овој вакуум простор, де факто и де јуре, автокамповите на територијата на државата се непостоечки. Агенцијата почнувајќи од годинава многу поактивно ќе работи на нови инвестиции и нови автокампови во државата, со кои ќе се доближиме до стандардите за овој вид сместување што владеат во регионот и во ЕУ. Убеден сум дека годишно може да оствариме еден милион ноќевања ако нашите автокампови бидат типизирани според светските – додава Јаневски.

Директорот на АППТ уште потенцира дека е неопходно создавање туристичка полиција и инспекција, кои ќе помагаат во насочувањето на туристите, но и во намалувањето на сивата економија во туризмот.

Според податоците на Светската туристичка организација, сивата економија во туристичката индустрија на Балканот е во рамките од 40 до 45 проценти, средства што се неповратно загубени – поентира Јаневски.

Годинава ќе имаме одлична туристичка жетва

Оваа година ќе биде најдобра за туристичката индустрија, а девизниот прилив ќе надмине 500 милиони долари што ќе се слеат во македонската економија и ќе бидат одработени од 33 до 35.000 вработени во овој сектор, вели директорот на АППТ.

Ова е доволна причина во идните 5 години да се фокусираме на развојот на туризмот и на инвестициите во нови содржини, со што растот на овој сектор во БДП ќе стаса до 5 отсто до 2026 година – дециден е Јаневски.