Од болница во Истанбул се врати уште еден пациент, кој беше на лекување по пожарот во дискотеката во Кочани. Остануваат уште двајца пциенти во „Аџибадем Систина“, кои се во тешка, но е критична состојба, информираше директорот на Фондот за здравствено осигурување, Сашо Клековски за време на денешната посета на болницата во Кочани.

Тој нагласи дека продолжува физикалната терапија на сите повредени на кои им е потребна. Пациенти биле прегледани од познат пластичен хирург од Белгија, кој правел проценка на оние со изгореници на лице, врат и на шаки.

„Се работи за 18 повредени кои се најсензитивни и на кои ќе им биде потребен подолготраен третман на лекување. Ќе направиме се што е потребно за сите повредени од сето ова излезат и живи и здрави и убави“ рече Клековски и вети дека нивната поддршка ќе продолжи и откако пациентите ќе ја напуштат болницата.

Директорката на болницата во Кочани, Катерина Паниќ Мирчовска, рече дека кај некои потребни се операции за враќање на функцијата особено на прстите од рацете, а ним ќе им бидат извршени хируршки зафати.

Во болницата во последниот период вработени се 20 лица, но како што нагласи директорката и натаму ќе треба да се надополнува персоналот.

„Секогаш имаме недостиг на специјалисти, но со оглед на тоа што имаме соработка со Клиничката болница во Штип, тој недостиг се надополнува. Дополнително, зголемен е буџетот на болницата, за да ги надмине акумулираните долгови. Набавен е и рентген за болницата, а при крај е и изградбата на новиот физикален центар“ рече таа.

Се работи на обезбедување систем за централно снабдување со кислород на хируршките сали.