Од општинската организација на Црвен крст Берово денеска упатија апел до граѓаните за донации на храна и пијалаци, наменети за екипите кои го гаснат шумскиот пожар што го зафати подрачјето на општина Берово.

-Во овие тешки моменти, екипите на терен несебично се борат со огнената стихија за да ја заштитат природата која нè опкружува. Ве повикуваме сите кои сте во можност да донирате нерасиплива и конзервирана храна, флаширана вода, електролити и освежителни пијалаци, стои во објавата на Црвениот крст Берово.

Пунктот за донации е отворен во салата на Општина Берово, секој ден од 08:00 до 15:00 часот.

Од Црвениот крст изразија благодарност за покажаната хуманост и солидарност, и ја повикаа јавноста да продолжи со поддршката за, како што велат, хероите на терен.