По три години пауза, од 3 мај повторно се враќа линијата од Скопје до Барселона. За првпат ќе се лета и до Лион.

Летовите ќе ги реализира Визер со субвенции од Владата, беше соопштено на денешната прес-конференција од ТАВ Македонија и Визер.

На релацијата Барселона Скопје ќе има летови двапати неделно, во вторник и сабота, а до Лион трипати, во вторник, четврток и в сабота. Првиот лет од Скопје за Барселона ќе се реализира в сабота во 18.50 часот, а двајца патници ќе добијат бесплатни авиобилети преку избор на социјалните мрежи.

„По тригодишна пауза пак ги поврзуваме Скопје и Барселона по воздушен пат. Враќањето на оваа линија е резултат на заедничка визија, соработка и силна заложба од страна на нашите партнери Владата и Визер“, изјави генералниот директор на ТАВ Македонија, Неџат Курт.

Меѓународниот аеродром Скопје првпат се поврзува со Лион, како што рече Курт, посебен град којшто има што да понуди, под заштита на УНЕСКО и роден град на кинематографијата со атрактивна гастрономска понуда.

Курт соопшти дека таргетирани им се и дестинациите на шпанското и италијанското крајбрежје, враќање на линијата кон Ларника во Кипар, како и отворање директни линии кон Прага и Мадрид.

Со финансиска поддршка од Владата на крајот на март требаше да стартува и летот Скопје – Дубаи, но е одложен за наеесен. Олеснувањето на визниот режим што го најави Владата, според раководството на ТАВ, ќе донесе многу патници на најавената линија.