Системот за влез/излез во Европската Унија (ЕЕС) започнува со постепена примена од 12 октомври, најави денеска евроамбасадорот Михалис Рокас. Станува збор за мерка што има цел да ја зајакне безбедноста на надворешните граници на ЕУ и во исто време да го олесни влезот за патниците.

Според Рокас, граѓаните од трети земји ќе треба еднаш да се регистрираат со отпечатоци и фотографија, по што при следните влезови ќе можат да користат автоматски терминали на аеродромите. Тој потенцираше дека овој систем не треба да се меша со ЕТИАС, за кој дополнително ќе има информации за имплементацијата.

ЕЕС е заеднички електронски систем кој ќе ги евидентира датумите, времето и местото на премин на надворешните граници на ЕУ. Со ова дефинитивно ќе се укине печатирањето пасоши. Системот автоматски ќе го пресметува дозволениот престој за државјаните на трети земји и ќе испраќа предупредувања кога тој рок ќе биде надминат.

Примената на ЕЕС беше првично предвидена за ноември 2023 година, но беше одложена поради неподготвеност на дел од земјите членки. Европската комисија затоа одлучи воведувањето да биде постепено.

Нови правила на границите за влез во ЕУ, ќе важат и за нас