Од утре во Македонија почнува со работа Oценската мисија на ЕУ која ќе го следи правосудниот систем и ќе предложи краткорочни и среднорочни мерки со цел да се зајакне независноста на судството.  Лидер на тимот е Бранко Хрватин, поранешен претседател на Врховниот суд на Хрватска. Тој ќе престојува во земјава утре и задутре, со што ќе го означи почетокот на работата на мисијата, информира Делегацијата на Европската Унија во земјава.

Прво ќе се идентификува обемот на работа што ќе ја врши оценската мисија, а работата ќе биде комплетирана од експерти од земјите-членки на ЕУ, кои во септември ќе ја посетат земјава.

-Тимот на експерти од земјите-членки на ЕУ ќе ја испитаат институционалната рамка на Судскиот совет и ќе предложат краткорочни и среднорочни мерки, вклучувајќи легислативни и институционални мерки, со цел да се зајакне независноста, непристрасноста и кредибилитетот на значајното управувачко тело на судството, се вели во соопштението.

Евроамбасадорот во земјава, Дејвид Гир во интервју за „Слободен печат“ минатата недела најави дека мисијата ќе дојде наскоро и ќе даде препораки, кои може да бидат најдобри на светот, но имплементацијата ќе зависи од политичката волја на владата, судството…

На прашањето зошто има потреба од Оценска мисија, Гир вели дека ЕУ ја праќа бидејќи Судскиот совет има специјална улога, исто како и Советот на јавни обвинители.

-Тоа е срцето на судските реформи. Бидејќи тоа е тело кое е одговорно за заштита и промовирање на независноста, интегритетот и професионализмот на судиите. Она што го видовме во изминатите неколку месеци е многу загрижувачко, едноставно не си ја врши работа. Она што сакаме да го направиме е да ја покажеме нашата загриженост и да се обидеме да помогнеме, да видиме како проблемите во Судскиот совет можат да се надминат. Но, не со праќање бирократи како мене, туку со испраќање судии да дојдат и да видат како работите можат да се сменат, дали со промена на закон или со промена на практика или со охрабрување на судиите да дејствуваат поинаку – појаснува Гир.