Обвинителството потврди дека има отворено предмет во кој се испитува именувањето на заменик-директорката на Агенцијата за разузнавање, Ивана Стојановска за која Антикорупциската комисија го запре предметот, иако за неа имало поднесено осум пријави во кои е оспорена нејзината биографија, односно дека не го исполнува условот за разузнавачки стаж за да биде заменик- директорка, но имаше и барање дека била назначена под партиско влијание.

-Во Основното јавно обвинителство Скопје е оформен предмет во кој се споени неколку пријави примени анонимно преку редовна пошта и различни електронски адреси. Пријавите се во врска со постапки за назначување во Агенцијата за разузнавање. Надлежниот јавен обвинител презема дејствија за проверка на наводите само во рамките на своите надлежности, односно испитува евентуална кривична одговорност – велат од Обвинителството за „Слободен печат“.

За информациите дека е поднесена кривична пријава за членовите на ДКСК затоа што не постапувале по овој предмет, од Обвинителството велат дека до овој момент до ОЈО Скопје не е пристигната таква пријава.

Антикорупциската комисија, слично како и за директорот на Агенцијата за национална безбедност, Бојан Христовски, само сега на затворена седница, ја запре постапката против заменик-директорката на Агенцијата за разузнавање, Ивана Стојановска, која беше отворена уште во јули минатата година, со образложение дека и Јавното обвинителство отворило предмет против Стојановска со исти наводи дека доставила лажна биографија и фалсификувани документи.

ДКСК го затвори за јавност предметот за заменичката на АР – претседателката во одбрана на директорките