Како резултат на материјални и видеодокази обезбедени при претресите во акцијата што под раководство на јавен обвинител беше спроведена на 18 и 19 јануари годинава, денеска се уапсени двајца осомничени, соопшти Основното јавно обвинителство за гонење кривични дела од организиран криминал и корупција (ОЈО ГОКК).

Тие се товарат дека сториле кривично дело – неовластено производство и пуштање во промет на психотропни супстанци и прекурсори.

„Од екстрахираните податоци, истражителите од Лабораторијата за дигитална форензика при Истражниот центар на Основното јавно обвинителство за гонење на организиран криминал и корупција, дојдоа до докази дека првоосомничениот кој беше лишен од слобода во Гевгелија, (Раде Трајковски Штекли) во бункер во ПМВ сокрива поголемо количество на психотропна супстанца. По обезбедена наредба за вештачење на возилото коешто беше одземено, пронајдени се 3,5 кг кокаин. Воедно, како резултат на доказите побарани се и извршени претреси на дом кај приведените лица и притоа е пронајден уште 1 кг кокаин“, велат од Обвинителството.

Оттаму додаваат дека за едниот од денеска уапсените побарало притвор, а за другиот – куќен притвор.