Во врска со настан регистриран на видео снимки објавени на социјалните мрежи во Куманово, Основното јавно обвинителство Куманово постапува по кривична пријава против вкупно 17 лица, соопштија од ЈОРМ.

„Против 10 пријавени надлежен јавен обвинител веќе поведе постапка за кривично дело – Насилство од член 386 став 2 од Кривичниот законик. До судијата на претходна постапка од Основниот суд Куманово за нив е поднесен предлог за определување мерки за претпазливост – забрана за напуштање на живеалиште, привремено одземање на патната или друга исправа за преминување на државната граница и обврска повремено да се јавуваат во суд.За останатите пријавени, меѓу кои има и малолетни лица, одлуката за натамошниот тек на постапката ќе биде донесена в понеделник, соопштија од ЈОРМ.

Во вторникот се појави видео снимка на која се гледа како група од околу петнаесетмина напаѓачи бркаат момче, додека се слушаат пцости и навреди.

Околу снимката дента се огласи Јавното обвинителство, кое соопшти дека заедно со кумановската полиција „интензивно постапуваат за расчистување на настанот регистриран на видеоснимки објавени на социјалните мрежи, во кои, според првичните информации кои се проверуваат, две лица биле предмет на напад од поголема група“.

„Речиси сите лица од објавената видеоснимка се веќе идентификувани и се преземаат дејствија за утврдување на причините и мотивите за инцидентот. Се врши распит и на учесниците и на други лица кои би можеле да имаат одредени сознанија. По целосно утврдување на фактите, Основното јавно обвинителство Куманово ќе донесе одлука за натамошниот тек на постапката, за што јавноста веднаш ќе биде информирана​“, пишуваше во соопштението од ЈО.

Утредента полицијата соопшти дека е расчистено насилството во Куманово, насилниците уапсени и не станувало збор за меѓуетнички елементи.

„На 15.11.2022 во Куманово, полициски службеници од СВР Куманово ги лишиле од слобода Р.И.(18), Ф.А.(19), А.Д.(20), К.Г.(18), А.Т.(18), А.В.(18), А.С.(20), А.Б.(23) и Л.С.(19), сите од Куманово и кумановско, а на службен разговор биле повикани и тројца малолетници од Куманово.Тие се сомничат дека на 14.11.2022 на улицата „Карл Маркс” во Куманово со тврди предмети му го оштетиле возилото на Б.Ш.(20) од Куманово, по што тој во обид да избега предизвикал сообраќајна незгода удирајќи во паркирано возило. По целосно документирање на случајот против сите лица ќе следуваат соодветни пријави.“ соопштија од полицијата

Инаку од Алијансата за Албанците објавија дека инцидентот имал меѓуетничка позадина.

„Кој се обидува да го наруши соживотот во Куманово?“ Димитриевски бара одговори од државниот врв

​​