На четиридневниот коњички тркачки фестивал Челтенхам во Велика Британија обложувачите ставиле облози од вкупна вредност од над една милијарда фунти, јавуваат медиумите од Островот.

Вкупно има над 274.000 обложувачи, што е рекорд за овој традиционален коњички натпревар. Фестивалот започнува денеска, а кулминацијата ќе биде в петок, на последниот ден од трките.

Еден од позабележителните ликови на овој фестивал е Сер Алекс Фегусон, познатиот некогашен менаџер на Мначестер јунајтед, чија страст за тркачките коњи одамна е позната. Тој има три тркачки грла кои ќе се натпреваруваат на некои од повеќето трки на овој фестивал.

И продавачите на пиво тријат раце, затоа што се очекува да бидат испиени 220.000 чаши од марката „Гинис“.

Фестивалот Челтенхам е со традиција од 1860 година и се одржува секоја година. В петок ќе биде најважната трка, наречена Голд куп. Вкупниот награден фонд за оваа трка е 625.000 фунти, а победникот ќе добие 351.000 фунти.

Минатата година беше историска за Голд куп, затоа што првпат победи жена, џокејот Рејчел Блекмур, на грлото А Плу Тар.