По 20 дена од отворањето на истрагата за „Адитив“, Министерството за внатрешни работи распиша потерница по поранешниот директор на АД ЕСМ, Васко Ковачевски.

Тој е осомничен за несовесно работење на службата и за него прво се бараа мерки за претпазливост, но не му беа одредени бидејќи како што соопшти Обвинителството за гонење на организиран криминал, МВР не доставило известување дека Ковачевски е недостапен за органите на прогонот.

Минатата недела откако МВР достави известување до Судот, предложените мерки за претпазливост Судот не ги прифати, па Обвинителството побара притвор за него.

-Согласно своите законски надлежности, јавните обвинители кои постапуваат во предметот до судијата на претходна постапка веднаш доставија Жалба по однос на донесеното Решение за отфрлање, како и Предлог за определување на мерка притвор за осомничениот која мерка ќе биде активна по неговото пронаоѓање. Судијата на претходна постапка го прифати предлогот на обвинителството и на осомничениот му определи мерка притвор во траење од 8 дена. Применувајќи ги одредбите од Законот за кривична постапка, предметните јавни обвинители до МВР доставија Наредба за распишување на национална потерница и Изјава за распишување на меѓународна потерница по осомниченото лице. Истрагата за предметот „Адитив“ започна на 10 овој месец и со него се опфатени 23 физички лица и четири правни лица за кои постои основано сомнение дека сториле кривични дела против јавните финансии, платниот промет и стопанството и кривични дела против службената должност и против правниот сообраќај, соопшти Јавното Обвинителство.

Ковачевски беше надвор од државата неколку месеци пред да биде отворена истрагата. Тој и уште неколку лица се товарат за криминал со трговија со адитиви за трите термоцентрали во Македонија.

За Васко Ковачевски нема ниту потерница ниту мерки