Според годишниот извештај на глобалната компанија за истражување на пазарот „Еуромонитор интернејшанл“, од 100-те најдобри градови во светот, дури 63 се европски градови, пишува „Си-ен-ен“.

Како најатрактивен град во светот повторно е прогласена француската престолнина, Париз. Индексот на топ 100 градови за 2023 година, произведен во партнерство со компанијата за податоци „Лајтхаус“, ги разгледа водечките градови од целиот свет и ги рангираше според критериумите, вклучувајќи туризам, одржливост, економски перформанси и здравје и безбедност.

На врвот на листата владее Европа со седум од топ десет градови и вкупно 63 земји од 100-те најдобри. Единствените неевропски градови во топ 10 се Дубаи на второто место, Токио на четвртото место и Њујорк на осмото место.

Главниот град на Шпанија, Мадрид е на трето место, а потоа следуваат Амстердам, Берлин, Рим, Барселона и Лондон.

Градовите од Азија се во првите 20 градски дестинации. На листата се најдоа Сингапур на единаесетото место, Сеул на четиринаесетото, Осака на шестнаесетото место и Хонг Конг на седумнаесетото.

Извештајот го припишува успехот на Европа на „брзата урбанизација и широкото усвојување на технологијата“, бидејќи патниците сега сакаат брз интернет, флексибилни опции за резервации и простори за работа на далечина.

„Подобрувањето на одржливоста, транспортните мрежи и социјалното влијание се некои од клучните цели што градовите ги прифаќаат денес за да ја зголемат конкурентноста, да ја подобрат својата туристичка понуда и да обезбедат беспрекорно патување на клиентите“, велат од компанијата.

Токио за првпат влезе во топ 10, а во извештајот се вели дека тоа се должи на подобрената туристичка инфраструктура, олеснувањето на регулативите поврзани со „ковид-19“ и ослабената валута, која на меѓународните посетители им нуди одлична вредност за парите.

Меѓународните патувања продолжија да закрепнуваат, при што бројот на патувања се предвидува да достигне 1,3 милијарди до крајот на 2023 година – што ќе генерира околу 1,7 трилиони американски долари во глобалната туристичка потрошувачка.

Инаку, Истанбул е на врвот на листата по бројот на меѓународни пристигнувања во 2023 година, потоа е Лондон, а по него и Дубаи. Градовите со најголем раст од година во година се Хонг Конг и Бангкок, поради тоа што беа меѓу последните кои повторно беа отворени по пандемијата „ковид-19“.

Сепак, зголемениот број на посетители може да биде „мешан благослов“ за овие градски дестинации, со негативни влијанија врз локалните заедници и животната средина.

„Некои дестинации наметнуваат ограничувања, нагло оданочување или намалување на капацитетот на хотелите за да помогнат да се ограничи приливот на туристи и да се зачува културното наследство, додека други прифаќаат стратегии за дисперзија кои промовираат алтернативни дестинации или дестинации кои не се вообичаени“, рече Надејда Попова, висок менаџер во компанијата.

Таа предвидува дека зголемените трошоци за живот, флуктуирачката инфлација и геополитичката нестабилност ќе бидат најголемите пречки кога станува збор за растот на туризмот во 2024 и 2025 година.