Клиничката болница Битола доби значајна донација во медицинска и немедицинска опрема од Oбединетата македонска дијаспора и невладината организација „World Medical Relief“.

Станува збор за опрема во која има апарати за стерилизација, ортопедски помагала, болнички кревети, медицински столици, инхалатори, апарати за мерење на притисок, инструменти и заштитна опрема, во вредност од 450.000 долари.

Според директорката на ЈЗУ Клиничка болница-Битола, Елизабета Ивановска опремата е од големо значење за болницата бидејќи со неа ќе се подигне степенот и квалитетот на здравствените услуги и здравствената нега на пациентите од целиот регион.

По врачувањето на донацијата директорот на Обединета Македонска дијаспора за Македонија и Европа, Гордан Јорданов истакна дека голема е честа во пресрет на Божиќните празници да бидат во можност како организација по вторпат да организираат донација на медицинска опрема од овој карактер и со тоа да се заокружи 1 милион американски долари во медицинска опрема да бидат доделени на здравствените установи во државата.

Тој искажа подготвеност ваквите акции за донација на медицинска и немедицинска опрема на болниците во Македонија да станат традиции.

-Секоја година ОМД ќе биде во можност да направи контрибуција во модернизирањето и развивањето на здравствениот сектор, како и да помогне во осигурување на основните потреби на пациентите во Македонија, истакна Гордон Јорданов.

На врачувањето на донацијата присуствуваше и министерот за здравство Фатмир Меџити, кој изрази задоволство од донацијата и рече дека со неа се врши зајакнување на капацитетите на Клиничката болница во Битола.