Десеткувана е понудата на новогодишни украси, сијалички и играчки од Кина, а дел од трговците на големо се жалат дека, иако навреме си ја платиле и порачале стоката, таа сѐ уште не е стигната. Во ова време од годината продавниците беа полни со празнични декорации, но она што актуелно се нуди е остаток од ланските залихи, со благо зголемени цени. И на дел од сајтовите што нудат вакви производи, кај повеќето лампиони стои објавата дека „нема залиха“. Трговците велат дека нема да ги зголемат цените на пластичните елки, иако граѓаните почнале да се интересираат за украсните дрва, чијашто цена и покрај фактот дека станува збор за еднократен трошок, се движи од 2 до над 5.000 денари.

– Претходните години стоката од Кина пристигнуваше уште на почетокот на ноември, а сега не се знае дали ќе стигне и пред Нова година – велат дел од трговците на Пластичарската улица во Скопје.

Нивните рафтови се речиси празни, па нема што да им понудат и на дуќанџиите на мало, кои по традиција купуваат од нив.

– Цените на кинеските производи се поскапени поради растот на цената на бродскиот транспорт, но и на пластиката и металот. Поради тие причини дел од трговците воопшто и не правеа нарачки, па можеби е очекувано на пазарот да има помало количество новогодишни декорации. Со оглед на фактот дека проблемот со бродскиот превоз трае подолг период, ние уште летоска нарачавме стока за да ни стигне навреме, а набавуваме и од европските земји. И ние слушнавме дека дел од муштериите се жалат дека нема избор – велат за „Слободен печат“ од компанијата „Атлантик ФМ“.

Поради пандемијата, речиси две години има огромно поскапување на бродскиот транспорт, велат од фирмите што се занимаваат со меѓународна шпедиција. Тие ги потврдуваат жалбите на нивните клиенти што се занимаваат со трговија со детски играчки и декорации. Шпедитерите велат дека цените на бродскиот превоз се менуваат на секои 15 дена, а актуелно се движат од 15 до 17.000 долари за контејнер. Според извештаите на реномираниот Блумберг, бродските превозници остваруваат поголема заработувачка уште од 2008 година!

– За да се донесе стока со бродски контејнер од Кина во Македонија се потребни од 35 до 40 дена во идеални услови, но ако има метеж при товарењето или истоварот во некое од попатните пристаништа, се појавуваат доцнења – рекоа неодамна за „Слободен печат“ од  „Навико шипинг“, компанија специјализирана за бродско-контејнерски превоз на стоки од и за Македонија. Ако цена на бродскиот транспорт со еден помал контејнер лани есента изнесуваше од 2 до 4 илјади долари, сега за истата големина се плаќа и четирипати поскапо.

Годинава речиси и да нема петарди

Празни се и тезгите пред еден од најголемите зелени пазари во Скопје, каде што ланските години и покрај забраните имаше понуда на пиротехнички средства. Тезгаџиите не се многу расположени за муабет на оваа тема, но велат дека ем немале од каде да набават ем им било страв од големите казни.

Како што се наближуваат празниците, МВР почна со превентивни кампањи за штетноста од користењето на пиротехничките средства, но и дека тоа е казниво со закон. Глобата е од 200 до 500 евра за оној што употребува пиротехнички средства. Оној што неовластено продава вакви средства, се казнува со затвор од 3 до 10 години.