Дел од обвинетите за организирањето на „крвавиот четврток“, упадот во Собрание кој се случи на 27 април 2017 година, се на чекор да бидат ослободени од кривично гонење, а еден ден пред Нова година се очекува претседателката Гордана Сиљановска-Давкова да објави кои од осудениците кои упаднаа ќе се најдат на нејзиниот празничен список. На него можно е да се најдат и оние кои веќе петта година по ред издржуваат затворски казни за упадот во Собрание.

Официјално, двајца од 16-те осуденици поднеле барање за помилување до Комисијата кај претседателот за државата, но кои се нивните имиња јавно не се открива. Оваа информација за „Слободен печат“ ја потврдија од Министерството за правда. Помилувањата на овие осуденици во предизборна кампања најавуваа и Христијан Мицкоски и Сиљановска-Давкова.

– На разгледување до Комисијата за помилување кај претседателот на државата доставени се барања за помилување за две лица – велат од Министерството за правда за „Слободен печат“.

Меѓу помилуваните може да бидат Митко Чавков, осуден на 18 години затвор, Митко Пешов од МВР (15), Душко Лазаров од МВР (15), Горан Ѓошевски Леви, поранешен шеф на обезбедувањето на Трајко Вељаноски (15), Оливер Поповски од МВР (13), неговиот колега Оливер Радулов (10), Мунир Пепиќ од Агенцијата за разузнавање (15).

Во затвор се и напаѓачите со фантомки Младен Додевски (12), Јане Ченто (15), Горанче Анѓеловски (12), Игор Југ (12), Влатко Трајковски (15), Вилијам Михајловски (14), Никола Митревски Кољо (15).

Најниска казна доби клучниот сведок Александар Василевски Нинџа (8), кој пред судот раскажа детално што се случувало и кој го организирал упадот во Собрание кога беа претепани пратеници од тогашната опозициска СДСМ, но и новинари. Сите се осудени за терористичко загрозување на уставниот поредок.

Одбраната на дел од осудените е воздржана и нема никаков коментар за евентуални помилувања, а во Кривичниот суд досега нема барање за повторување на судењето со нови докази, како што се најавуваше.

Според Законот за помилување, претседателката може да помилува и лица кои не побарале лично помилување, но по предлог на министерот за правда или по молба што ја поднеле нивни блиски роднини. Освен ова, има и правно толкување дека претседателот може да помилува и по исклучок без спроведување постапка, кога тоа е од интерес на државата.

За упадот во Собрание кој според сведочењето на Нинџа се организирал на линија со штабот на ВМРО-ДПМНЕ, во затвор завршија само дел од оние кои упаднаа. За овој случај како неправда ќе виси Законот за амнестија што го изгласаа пратениците по прошката на поранешниот премиер Зоран Заев и со кој се спасија 15 обвинети, меѓу кои и пратениците што ги отворија вратите и организаторите на протестите.

На чекор да се спасат од кривичен прогон се и поранешните функционери од ВМРО-ДПМНЕ, Трајко Вељаноски, Спиро Ристовски и Миле Јанакиески, откако Обвинителството достави мислење до Судот дека Законот за амнестија треба да важи и за нив, но не и за поранешниот директор на Управата за безбедност и контраразузнавање, Владимир Атанасовски, затоа што бил директор на институција поврзана со безбедноста, а за вакви лица има ограничувања во Законот за амнестија.

Обвинителството се повикува на пресудата на скопска Апелација која ја укина пресудата за организаторите на 27 април и во врати предметот на повторно судење токму поради прашањето за примена на Законот за амнестија, за која претходно Кривичен кажа дека не важи за овие обвинети. Судијата Илија Трпков, на почетокот на идната година треба да донесе одлука, дали тројцата поранешни високи функционери во ВМРО – ДПМНЕ нема веќе да треба да доаѓаат во суд и ќе бидат амнестирани.

Новогодишните помилувања ќе бидат прва одлука на новата Комисија за помилување што ја формираше претседателката откако претходниот состав даде неотповиклива оставка и го понесе товарот на помилувањата во октомври, за Денот на македонската револуционерна борба кога беа беше помилуван член на нарко – картелот „Барон“, криминална група која беше таргет на една од полициските акции.